Водне колесо

Водне колесо млина з Колочавы

Приток згорѣ

Приток зоз середины

Приток зосподу

Водне колесо — найпростѣйшый водный мотор, гидравличный механизм, маючый колесо з лопатнями, котре ся обертать потоком воды.

Водне колесо было хосноване од старовѣку аж до XX. стороча.

Выкон водного колеса

Выкон водного колеса зависить од протока (литры за секунду) и вышкы спаду (роздѣл меджи горѣшнов и споднов ровинов воды в метрах), а од того ся дасть выраховати.

Кедь маса воды $Q$ л за едну секунду (проток) спаде з вышкы $h$ м (спад), грубый выкон буде

$P_a=\frac{Qh}{75}$ конскых сил

Тот грубый выкон але зменшить ся вытратами в самом механизмѣ (тертя), а тыж часть воды стратить ся мимо механизму. Тоты безхосенны вытраты подля типа колеса можуть быти 10-45% цѣлого грубого выкона. Тото, што зостане е ужиточный выкон водного колеса $P_u$, а одношѣня ужиточного и грубого выкона буде его ефективность

$\epsilon =\frac{P_u}{P_a}$100%

Типы водного колеса

Водне колесо подля системы притоку воды може быти з горѣшным, середным або сподным притоком. Розличны конштрукции мають свою сферу хоснованя и розличну ефективность.

Приток згорѣ

Такы колеса суть придатны при спадѣ 3-12 м, а при протоку 50-800 л/сек. Вода оддѣюе на колесо своев гравитачнов масов.

Тоты колеса мають найвекшу ефективность — 80-90%.

Приток зоз середины

высше оси

Кедь у того типа колеса вода паде на лопатнѣ кус выше од оси колеса, тоты колеса суть про спад 5-8 м, а проток 30-1300 л/сек. Дѣе гравитация масы воды.

низше оси

Кедь же у того типа колеса вода паде на лопатнѣ кус ниже од оси колеса, оддѣюе не лем своев масов, але и своев скоростьов руху. Такы колеса поуживають при спадѣ 2,5-4,5 м, а протоку 120-6000 л/сек.

Ефективность того типа колеса 50-60%.

Приток зосподу

В том припадѣ вода трафлять на колесо доста глубоко под его осьов, а переважно оддѣюе скоростьов свого руху. Ужиточны при спадѣ 0,2-1,7 м, а протоку 100-4000 л/сек. Такы водны моторы ся поуживали на рѣчных лодях.

Тот тип колеса мав найменшу ефективность — 20%, а лем в XIX. сторочу досяг 50-60%.

Жерела и одказы

• Vodni motory. //Ottův slovník naučný. Illustrovaná encyklopaedie obecných vědomostí. Díl 1–28. Vyd. J. Otto. V Praze, 1888–1909. Еом 26, сс. 871-874.
• Прохоров А. М. (гл. ред.). Большой энциклопедический словарь. Москва: Советская энциклопедия, 1993. 1630 с. Шаблона:ISBN